ރަމަޟާންމަހުގެ ރޯދަޔަށްފަހު އަންނަ ޢީދަކީ އުފާފާޅުކުރުމުގެ ދުވަހެވެކެވެ. މާތް ﷲ އަށް ތަކްބީރް ކިޔައި ހަމްދު ކުރުމުގެ ދުވަހެކެވެ. ޢީދުދުވަހާ ޖެހިގެން ދެން އަންނަ އެއްމެ އަހައްމިއްޔަތުކަން ދެވިފައިވާ ކަމަކީ ހަރޯދަހިފުމެވެ. ރަމަޟާންމަހުގެ އަޅުކަންތައްތަކުގައި ދެމިހުރުމަކީ ވަރަށްވެސް މުހިއްމުކަމެކެވެ. ހަރޯދައަކީ އަޅުކަމުގައި ދެމިހުރުމަށްޓަކައި ލިބޭ އިތުރު ބާރެކެވެ. ރަމަޟާންމަހުގެ އަޅުކަންތައް ޤަބޫލްވެވުނު ކަމުގެ އިޝާރާތްތަކުގެ ތެރޭގައިވެސް އަޅުކަމުގައި ދެމިހުރުން ހިމެނެއެވެ. މިވާހަކަތައް ވާނީ ތިރީގައި މިވާ ލިޔުމުގައި ބަޔާންވެ ގޮސްފައެވެ.
މާތް ރަސޫލާ ﷺ ގެހަދީޘް ބަސްފުޅެއްގައިވެއެވެ.
”ރަމަޟާން މަހު ރޯދަ ހިފުމަށް ފަހު އެއާ ވިދިގެން ޝައްވާލުމަހުގެ ހަދުވަހުގެ ރޯދަ ހިފި މީހާ މުޅި އަހަރު ދުވަހު ރޯދަ ހިފިފަދައެވެ“
މިއީ ސުންނަތްއަޅުކަމެކެވެ. ސުންނަތް އަޅުކަންތައްތަކަކީ އަހަރެމެންގެ ފަރުޟު އަޅުކަންތައްތަކުން އުނިވެފައިވާ ބައި ޤިޔާމަތްދުވަހު ފުރިހަމަ ކޮށްދޭނެ ކަންތައްތަކެކެވެ.އެހެންކަމުން ސުންނަތް އަޅުކަންތައް ގިނަގިނައިން ކުރުމަކީ ފަހުން އޭގެ ފައިދާ ކުރާނޭކަންތައްތަކެވެ. އަދި ސުންނަތް އަޅުކަންތައް ކުރުމުގެ ސަބަބުން ފަރުޟު އަޅުކަންތައްތަކަށް ދެވޭ އަހައްމިއްޔަތާއި ސަމާލުކަން ބޮޑުވާނެއެވެ. ފަރުޟު އަޅުކަންތައްތަކަށް ފަރުވާކުޑަކޮށްލުމުން ދުރުކޮށްދޭނެއެވެ.
މުޅިއަހަރުދުވަހު ރޯދަހިފުމުގެ ޘަވާބު ލިބޭގޮތަކީ މާތް ﷲ ކޮންމެ ހެޔޮކަމެއް ދިހަ ގުނަ ކުރައްވާތީ ކަމުގައި ބެލެވެއެވެ. އެހެނީ ރޯދަމަހުގެ 30 ދުވަހުގެ ޘަވާބު ދިހަގުނަވުމުން އެވަނީ 300 ދުވަހުގެ ޘަވާބަށެވެ އަދި އިތުރު ހަދުވަހުރޯދަހިފުމުގެ ސަބަބުން އިތުރު 60 ދުވަހުގެ ޘަވާބު ލިބެއެވެ. މިއީ ޖުމްލަކޮށް 360 ދުވަހުގެ ޘަވާބެވެ. އަހަރެއްގައި ހިމެނެނީ 365 ދުވަސްކަމަށްވާތީ އަހަރުދުވަހު ރޯދަހިފުމުގެ ޘަވާބު ލިބެނީއެވެ.
ފަށާނީ ކޮންއިރަކު
އެންމެ ރަނގަޅު ގޮތަކީ ޢީދުދުވަހާ ޖެހިގެން ދެން އޮންނަ ދުވަސްތަކުގައި ހަ ރޯދަ ހިފުމެވެ. އެހެނަސް ހަދީޘްގައި ވަކި ދުވަސްތަކެއް ކަނޑައެޅިފައެއްނެތެވެ. އެހެންކަމުން ޝައްވާލްމަސް ނިމިގެން ދިޔުމުގެ ކުރިން ކޮންމެ ދުވަސްތަކަކުންވިޔަސް އެރޯދަތައް ހިފިދާނެއެވެ. އެހެނަސް ފަސްކުރުމުގެ ސަބަބުން ކަންނެތްކަމާއި ފަރުވާކުޑަކޮށްލެވޭ ގޮތް ގިނަފަހަރު މެދުވެރިވެއެވެ. މިކަމުން ރައްކާތެރިވުމަށްޓަކައި ޖެހިޖެހިގެން އެކީ އެކައްޗަކަށް މިރޯދަތައް ހިފާލުން ބުއްދިވެރިއެވެ.
މާތް ﷲ ގެ ދީލަތިވަންތަކަމުގެ ސަބަބުން އަހަރެމެންނަށް ދެއްވާ ފުރުސަތުތަށް ވަރަށްވެސް ގިނައެވެ. އެކަލާނގެ ދެއްވާ މިފަދަ އަގުހުރި ފުރުސަތުތައް ދޫކޮށްލާ ބަޔަކު ކަމުގައި ނުވުމަށް އަޒުމް ކަނޑައަޅާށެވެ. މިފަދަ ދެވަނަ ފުރުސަތެއް ލިބޭނެކަމުގެ އެއްވެސް ޔަޤީންކަމެއް އަހަރެމެންކުރެ އެއްވެސް މީހަކަށް ނޯންނާނެއެވެ.
